Gazteluko ostatuaren barruan herri kirolei buruzko lehen museo iraunkorra zabaldu dute eta gaur egin dute inaugurazio ekitaldia. Gorka Egia udal aholkularia aritu da museoa prestatzen eta berak egin ditu gaur gidari lanak; alboan, prozesuan lagundu dioten hainbat herri kirolari izan ditu, besteak beste, Joxe Gabirondo herritarra, Iñaki Perurena, Joxe Mari Olasagasti edota Juan Manuel Erasun.
Museoa ofizialki inauguratu aurretik herri kirolen erakustaldia egin dute ostatu atarian. Ondoko belazean, aurrena, segan aritu dira Gazteluko Sega Eskolako ikasleak, Gabirondo gidari zutela. Ondoren, aspaldiko kirol bat berreskuratu eta balenka erakustaldia egin dute. Bere garaian Migel Aranalde eta Baltasar Esnaola aritu izan ziren modalitate honetan, eta gaur Gaztelun, Hernaniko Fernando Dublangek egin du erakustaldia barrarekin.
Berriz ere, ostatu atarira itzulita, herritarrak aizkoran, trontzan, lokotx biltzen, ingudearekin eta korrika aritu dira.
Behin erakustaldia bukatuta, Egiak museoa erakutsi eta luntxa egin dute bertaratutakoek.
