Udaberriarekin batera festan murgiltzen dira gazteluarrak. Udaberri Festa antolatzen dute urtero, eta aurten larunbatean, maiatzak 20, egingo dute, eta egun osoko egitaraua prestatu du Kultura Batzordeak.
Batzordeko kide da Eider Olazar eta gogoratu du udaberria «zerbait polita» antolatzeko garai proposa zela pentsatuta hasi zirela Udaberri Festa antolatzen. Egunari hasiera emateko txotxongilo emanaldia izango dute; Ostomila txotxongilo taldea gerturatuko da Gaztelura eta Alaia galtzagorria ikuskizuna eskainiko du. Arratsaldean krep merienda egingo dute eta ondoren, Malkogarriyak taldearen kontzertua egongo da eliza atarian. Olazarrek esan duenez, hori da egun horretako ekintza «bereziena», eliza ataria «herriko txoko kuttuna» baita. Eguna amaitzeko afaria antolatu dute eta gaur da izena emateko azken eguna. Aurten lehen aldiz, ostatuan afalduko dute. Helduek 25 euro ordaindu behar dute, eta haurrek, berriz, 13 euro.
Egitaraua
Maiatzak 20, larunbata
- 11:00. Ostomila txotxongilo taldearen Alaia galtzagorria ikuskizuna.
- 17:00. Krep merienda, plazan.
- 18:30. Malkogarriyak erromeri taldearen kontzertua, eliza atarian.
- 21:00. Afaria ostatuan.