Azken urteetan, festen bueltan, herriko pertsona esanguratsuren bat omentzen dute, eta aurten, Norberta Lobregati egokitu zaio. Festak bere horretan ospatu ezin direnez, Kultura udara izeneko egitarau bat antolatu dute astebururako, eta hor egin diote lekua omenaldi xumeari.
Ia bizitza osoa darama Norbertak Gaztelun. Hamabost urte zituela Nafarroako Arrarats herritik Gazteluko Mikelene etxera joan zen bera eta familia osoa, bederatzi senidez osatua. Eta jarraian Iriartera ezkondu zen. Gazte garaian pilotan, antzerkian ibilitakoa, afizioa asko zituena eta dituena. Baserritarra, jostuna, esne partitzen ibilitakoa Tolosan, emakume ekintzailea, Ibarran taberna bat ireki zuen eta baita Tolosan fruta denda bat ere.
Herritarrek eskerrak eman nahi izan dizkie erreferente izateagatik. Lore sorta bat jaso du lehenik, eta ondoren, bi dantzarik agurra dantzatu die Irati Hartsuaga bilobak akordeoia jotzen zuen bitartean.
Omenaldiaren aurretik hasi dute plazan goiza gaztetxoenek. Serigrafia tailerra egin dute plazan, koloretako kamisetak margotu dituzte Gaztelun bizipoza auzolan esaldiarekin. Jarraian apar festa izan dute; hori ere plazan. Arratsaldean ere elkartu dira plazan; txokolatada egin dute lehenik, eta jarraian Distopia eletrotxaranga izan dute.
Hona hemen biharko prestatu dutena:
Abuztuak 15
- 09:30ean, diana herriko txistulariekin.
- 10:00etan, mendi buelta Uliko bordara.
- 18:00etan, herriko bi taldeen arteko herri kirolak.
- 19:00etan, Eingo taldea.