Milaka kilometrotara dauden euskal preso politikoei babesa adierazteko mezua ozen eta argi azaldu dute goizean Gaztelun: "Euskal presoen urrunketa eta dispertsioarekin amaitzea ezinbestekoa da, baita iheslari zein deportatuak etxeratzea ere". Euskal presoak eta haien ingurukoak egoera horretara eraman dituen urrunketa eta dispertsioa erabaki "maltzurra eta krudela" dela gogorarazi dute. Bide batez, erabaki horren ondorioz errepideetan hil diren 16 lagunak gogoan izan dituzte, baita atzo bertan Topaseko (Salamanka) espetxetik bueltan senideek izan zuten istripua ere.
Kilometroetan distantziak urruntzen dituen arren, presente izan dira Ana Belen Egues, Maite Aranalde eta Andoni Otegiren eskutitzak; euren senitartekoek irakurri dituzte. Elkartasun keinuen artean, azaroaren 27an espetxea atzean utzi zuen Andoni Goikoetxea gazteluarrari opariak egin dizkiote herritar eta bizilagunek, eta lore sorta bana eman dizkiete eskualdeko beste euskal preso politikoen senideei. Izan da bestelako keinurik: pilota partidak jokatu dituzte lehendabizi, eta txalaparta hotsek eta txikienen dantzek indarrak bidali nahi izan dizkiete euskal preso politiko guztiei.