Bizilagunei bostekoa ematea egokitu zaie, gaur, gazteluarrei. Bostekoa, bosteko proban: Txaramako taldeak irabazi du jaietako herri kirol desafioa, bost ariketako proban. Lokotx biltzean, txingan, zakua eramaten, trontzan eta korrika aritu behar izan dute bi taldeetako kirolariek, eta hiru itzuli osatu dituzte, guztira.
Eta, lagun arteko lehia horri esker, giro epela hartu du Gazteluko pilotalekuak, abuztuaren 15eko arratsaldeak gris aldera jo duen arren. Senide, lagun nahiz bizilagunak animatuz jardun dute ikusleek, eta norgehiagoka estu samar joan da, ia azken itzulira bitarte.
Postuak postu, ordea, proba amaierako kiroltasuna izan da arratsaldea biribiltzeko onena. Oholtzara igo dira guztiak elkarrekin, eta gaztetxoen sega erakustaldiaz gozatzen jarraitu dute, atertu duela probestuz.