Eguerdiko 12:00etan, emango zaie hasiera, aurten ere, Gazteluko Andre Mari jaiei, txupinak eztanda egitearekin batera. Ama Birjin egunaren bezperan, haurrak eta gazteak herria girotzeko beharrean izango dira. Suziria lehertu orduko, puzgarriekin jolastu eta zaldi gurdian ibiltzeko aukera izango dute. Ondoren, etxeko txikienen bazkaria egingo da, eta arratsaldean iritsiko dira gazteek antolatutako jarduerak: haurrentzako jolasak, apar festa eta musika kontzertua. Iluntzean egingo da herri afaria, frontoian, eta gaueko ordu txikiak bitarte, nahi duenak, izerdiren bat edo beste bota ahalko du DJ Jotatxoren musikarekin.
Egun handia, abuztuaren 15ean helduko da. Meza nagusiaren eta hamaiketakoaren ostean jokatuko dira gaztetxoen arteko pilota partidak. Bazkal aurretik, berriz, toka txapelketaren txanda izango da, eta ondoren, Gaztelu eta Txaramaren arteko herri kirol desafioa. Aurten ere antolatu dute patata tortilla txapelketa, hirugarren aldiz, eta irabazlea nor den, Mirari Martiarena eta Txikiren gaueko bakarrizketak entzun aurretik jakingo da.
Ikusi hemen egitaraua.