Elduaingo Udalak, kanpo argiteria publikoa egokitu eta berritzeko lanak gauzatu ditu. Obra lanak 2023an hasi zituzten eta iaz amaitu. Hain justu, Olaondotik Sales baserrira doan bidean eta Garaikoetxea baserritik Labaderoainoko bidean egin dituzte lanak. Europar Batasunak eta Eusko Jaurlaritzak diruz lagundutako proiektua izan da, eta zehazki, 37.891,02 euroko inbertsioa suposatu du; horietatik 13.640,76 euro udalak jarri ditu, 19.400,20 euro Europar Batasunak eta 4.850.05 euro Eusko Jaurlaritzak.
Udalak adierazi duenez, argia «funtsezkoa» da herritarren garapen sozial eta ekonomikorako, eta esan du «modu eraginkor eta arrazionalean» erabiltzen denean, argiteria publikoak «modu askotan» laguntzen diola herriari: «Hala nola turismoan, merkataritzan eta segurtasunean, eta argiztapen-baldintza onak bermatzen ditu oinezkoek eta ibilgailuen zirkulatzeko bide eta espazio publikoan».