Kirol-fit izeneko kirol saioak jarriko dituzte martxan Elduainen, Iñigo Barañano entrenatzaile pertsonalaren gidaritzapean. Horretarako, taldea osatzen ari dira eta lau aukera ezberdin proposatu dituzte: astelehenak 17:30etatik 18:30etara edo 18:30etatik 19:30etara, eta asteazkenak 17:30etatik 18:30etara edo 18:30etatik 19:30etara.
Taldea osatuz gero, parte hartzen duten herritarrek astean behin edo bitan joateko aukera izango dute. Astean behineko saioak hilean 20 eurokoak izango dira, eta astean bi eguneko saioak, berriz, hilean 40 eurokoak.
18 urtetik gorako herritarrek eman ahalko dute izena eta interesa dutenek osteguna baino lehen egin beharko dute inkesta betez.