Elduainen atxilotu dute lapurtutako auto batekin istripua izan eta ihes egin ondoren

Tolosaldeko Ataria 2021ko abe. 28a, 13:53

Ertzaintzak 53 urteko gizon bat atxilotu du bart GI-2130 errepidean, Elduain inguruan, Andoainen auto bat lapurtzea leporatuta. Gizonak istripua izan du lapurtutako autoarekin.

Atzo 22:30ak aldera Ertzaintza GI-2130 errepidera, Elduain ingurura, bertaratu zen istripu bat izan zelako. Autoa bidean iraulita zegoen. Ertzainak gerturatzean ikusi zuten istripua izan zuen pertsona oinez ihes egiten ari zela.

Segurtasun sailak esan du, gertaera ikertu ondoren egiaztatu dutela istripua izan zuen ibilgailua ordubete lehenago lapurtu zutela Andoainen eta gidariak ez zuela gidabaimenik. Gizona atxilotu eta Tolosako anbulatoriora eraman zuten zauri arinak tratatzera eta ondoren Ertzaintzaren egoitzara eraman zuten. Atxilotuari ibilgailua lapurtzea eta gidabaimenik izan gabe gidatzea leporatu diote, eta isun administratiboa jarri diote bere gauzen artean hainbat substantzia zituelako. Tolosako Guardiako Epaitegira eraman dute gaur goizean.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!