Kirolen batean federatzeko aukera izan zuten lehen emakumeak izan ziren raketistak. Horietako bat da Elduainen jaio zen Rosa Soroa. Herriak omenaldi bat eskaini nahi izan dio egindako ibilbideagatik. Lehendabizi emakume raketisten dokumentala ikusteko aukera izan da. Emakume raketista askok hartu dute parte filmean, eta tartean zen elduaindarra. Gogoan dituen pasadizoak kontatzen ditu, nola hasi zen, etxekoen erreakzioak, baita sekretu txikiak ere.
Dokumentala amaitzean, hamaiketakoa egitera joan dira guztiak. Nahiko sardina, Ibarrako langostino eta txorizo jan ostean, sagardoz eta txakolinez lagunduta, pilota partidak jokatu dituzte herriko gaztetxoek. Horren ondoren egin diote omenaldia herritarrari. Herritarrek esker ona erakutsi nahi izan diote lortutakoagatik.
Arratsaldean, Maitane eta bere taldearen kantaldia izango dute, eta txokolatadaren ondoren, Tio Teronen Semeak taldekoek, Freschool umorezko dantza ikuskizuna eskainiko dute.