Kultura batzordeak egin du lan parkearen berritzea lortzeko, "behar erreala" zegoela ikusten baitzuten. Bi urte horietan lan egin dute kultura batzordeko kideek diseinu berriarekin eta diru laguntzekin lanean. Azkenean, hiru deseinu mota geratu zitzaizkien eta hiruren artean herritarrek osatutako bilera batean eta haurrekin erabaki zuten zer nolako parkea egin nahi zuten.
Egurrezko etxetxoa eta hesia "errekuperatu" dituzte, eta gainerako elementuak berriak dira. Haurrek behar zituzten "elementuak" bateratuz. Eta gaur arratsaldean zinta moztuta parkera joatean erakutsi duten ilusioak gustukoa izan dutela erakusten du.
Elduainen 0-18 urte bitarteko 73 pertsona daude, eta hortaz, bai haurrak eta bai helduak biltzen dituen "gunea" dela uste dute: "Batez ere haurrentzako eta haur horien gurasoentzako". Guztiak, gainera, herriari "bizipoza" ematen diola uste dute.
Orain, abenduaren 30an, 11:00etan, auzolanean bilduko dira parkeko hesiak eta txabola margotzeko: "Kolore pixka bat eman nahi diegu auzolanean".
Kultur egitaraua
Herriko haur, gazte nahiz gurasoak elkartzeko "guneak" ez zeudela ikusi zuten kultura batzordean. Izan ere, eskolara Elduaindik behera joaten dira, eta lagunak ere bertan egiten dituzte. Horregatik, "herrian ez daukate elkargunerik", eta helduen kasuan ere antzeko zerbait gertatzen zela ikusita, "hainbat ekintza ezberdin" proposatzea erabaki zuten. Jendeak bere "proposamenak egiteko" eta "beharrak" adierazteko bide ezberdinak ireki zituzten.
Ikusten zen behar horietatik abiatuta sortu zen, esaterako, ikasturte honetan martxan jarri den zumba ikastaroa, Elduainen hamabina pertsonako bi talde dituena eta astearte eta ostegunetan biltzen dena, beraz, "oso arrakastatsua" izan dela uste dute.
Horiez gain, bestelako kultur ekimenak ere antolatu dituzte eta jarraian dituzue guztiak bilduta:
ABENDUAK 30, ASTEAZKENA
11:00. Parkea margotzeko auzolana.
ABENDUAK 31,OSTEGUNA
17:30. Urte Zahar festa.
URTARRILAK 1, OSTIRALA
09:30. Urdelarrera mendi irteera, plazatik abiatuta.
13:00. Brindisa, Zentroan.
URTARRILAK 15, OSTIRALA
17:30-19:00. Kultur etxean, zinea 2-13 urte bitarteko haurrentzat Minions pelikula. Sarrera: 0,50 euro
19:30-21:30. La Ola pelikula, 14-18 urte bitarteko gazteentzat, kultur etxean. Sarrera: 1 euro. Ondoren, Zentroan afaltzen geratu nahi duenak, urtarrilaren 13a baino lehen izena eman beharko du, Zentroan egongo den zerrendan.
URTARRILAK 29, OSTIRALA
19:00-21:00. Pintxo potea, Zentroan eta Kontsejuan.