Herenegun hasi ziren konponketa lanekin Elduaingo sarrerako errepidean, eta hilabeteko iraupena izango dute. Luizi baten ondorioz bidea hondaturik zegoen, eta azken bi hilabeteetan herritarrek ezin izan dute bertatik igaro.
2013 urtearen bukaeratik itxita egon da Elduainera sartzeko bideetako bat luizi baten ondorioz. Hori konpontzeko obrak nahi baino gehiago atzeratu dira, eta azkenean herenegun jarri ziren makinak lanean: «Lan horiek egiteko enpresa esleituta zegoen, baina, eguraldiaren ondorioz, lanen hasiera atzeratzen joan da, eta azkenean hasi dira konpontzen», adierazi du Izaskun Kerexeta Elduaingo alkateak.
Bi hilabetez egon da herriko sarrerarik garrantzitsuenetako bat itxita, eta obrek iraun bitartean itxita jarraituko du. Lanek hilabeteko epea izango dute. «Urak lurrak mugitu ditu, eta orain ur hori ondo bideratu beharko da behar bezala konpontzeko; eguraldiaren arabera lehenago edo beranduago amaituko dituzte lanak, baina, betiere, hilabeteko epearekin», azaldu du Elduaingo alkateak.
Errepide horrez gain, badira herrian luizien eraginez hondaturiko beste hainbat bide, eta horiek konpontzea ere aurreikusten du Elduaingo Udalak. Dena den, oraindik zehaztu gabe dute ekintza horiek noiz egingo dituen, izan ere, aurrekontuen eta diru laguntzen zain daude.