Aingeru Senperena pilotari goiaztarrak pilota egokituko Arabako Irekiko finaletako bat jokatu du goizean, Laudion. Urritasun fisikoko finala jokatu du, gurpildun aulkian eta gomazko paletarekin; Juanjo Rodriguezekin osatu du bikotea, eta Manu Quesada eta Gorka Alvarez izan dituzte aurkari. 20-22 galdu dute Senperenak eta Rodriguezek.
Uneoro markagailuan atzetik joan dira galtzaileak. 7-12 galtzen joan eta gero, 13na berdintzeko aukera izan dute, baina aurkariek aldea mantentzea lortu dute: 12-17. Amaieran, 18-21 galtzen joan ondoren, 21na berdintzeko aukera izan dute.
Udaberrian Bizkaia eta Gipuzkoako Irekiak jokatu ziren, eta orain, lehen aldiz jokatu da Arabako Irekia. Senperenak Gipuzkoakoa irabazi zuen, Beñat Lizasorekin. Bizkaikoa, berriz, Edorta de Anta tolosarrak irabazi zuen, Sergio Rodriguezekin bikotea osatuta.