Bidania-Goiatzen XXXV. Kultur Astea ari dira egiten egunotan, eta egitaraua borobiltzeko ekitaldi sorta prestatu dute ostiralerako, larunbaterako eta iganderako. Antolatu dituzten jardueretako batzuk dira argazki erakusketa, kirol txapelketak, azoka eta kultur ikuskizunak.
Ostirala argazki erakusketarekin hasiko dute, eta iraganeko zein gaur egungo irudiak topatuko dituzte bertaratzen direnek. 19:30etik 20:30era udaletxean ikusgai egongo dira, batetik, 1988tik 2004ra bitarteko eskolako argazkiak eta, bestetik, aurtengo Ama Birjin eta San Bartolome egunetako irudiak.
Asteburuko lehen eguna borobiltzeko, berriz, 22:00etan hasiko da pilotalekuan Ibarrako Alurr dantza taldearen emanaldi berria: Hamaikua.
Larunbat betea
Larunbatean, hilaren 26an, eskulanen tailerra eta frontenis txapelketa izango dituzte haurrentzat. Frontoian izango dira biak ala biak, eta adin batzuetara bideratuta egongo da jarduera bakoitza. Eskulanen tailerra Haur Hezkuntzako zein Lehen Hezkuntzako 1. mailatik 3. mailara artekoentzat izango da; eta frontenis txapelketa, berriz, LH 4. mailatik 6. mailara artekoentzat.
Bukatutakoan hamaiketakoa egingo dute, eta 16:30ean hasiko da eguneko azken hitzordua. 4 urtetik aurrerako haurrentzat eta gaztetxoentzat egingo dute Ehungintzaren berrerabilpen tailerra, Onnaren eskutik.
Azken eguna
Kultur Asteko azken egunean, irailaren 27an, berriz, azoka izango da goizeko protagonista. 11:00etatik 14:00etara produktuak Goiazko plazan eskainiko dituzte inguruko hainbat ekoizlek eta artisauek, eta sardina erreak zein taloak jateko aukera egongo da. Merkatua girotzen, berriz, Alaitz Aramendi eta Garazi Zubizarreta trikitilariak ariko dira.
Eskaintza borobiltzeko, Amak izeneko antzezlana egingo du Txalo ekoiztetxeak igande arratsaldean. Umore ikuskizuna 18:00etan hasiko dute, eta eskolan izango da.