Bidaniko frontoia omenaldirako gune bihurtu zen atzo arratsaldean. Herritarrek Miren Larrarte pilotari bidaniarrari omenaldia egin zioten, orain gutxi jokatu den Munduko Wall Ball Txapelketan urrezko domina bat eta zilarrezko bi lortu eta gero. Eskuz jokatutako pilota partida batekin hasi zen ekitaldia. Salsamendi-Erasun bikoak 22-16 irabazi zion Arrizabalaga-Agirre bikoari. Ondoren, herriko pilotari gaztetxoek pasilloa egin zioten Larrarteri.
Oparien tartea iritsi zen gero. Jose Mari Mitxelena Euskadiko Euskal Pilota Federazioaren lehendakariak oroigarria eman zion Larrarteri, eta, besteak beste, joko zuzenean egindako ibilbidea nabarmendu zuen. Agurra dantzatzeko unea iritsi zen, eta Larrarteren anai-arrebek ederki asko bete zuten eginkizun hori. Ondoren, Kukuri kultur elkartekoek lore sorta bat eman zioten, eta pilotariari eskertu zioten herriaren izena zabaltzea. Matraka taldekoek frontoi baten maketa oparitu zioten, more kolorekoa, eta zoriondu zioten «emakume pilotari bezala egiten ari zaren ibilbide guztiarengatik», eta eskertu zioten «herriko gaztetxo guztientzat eredu izateagatik». Udalaren txanda izan zen segidan, eta txapela oparitu zioten, eta esan beharrekoak bertso baten bidez esan zizkioten:
Bidaniako frontoiko
neska koskorra, ze kasu...
Eskuz, palaz, wallballean,
frontballean, horren ahaltsu...
Mundutik urre ta zilar
izerdituta dakarzu,
herri hau ezagut dadin
arrazoi izan zera zu.
Dugun harrotasunaren
eskerra jaso ezazu,
segi maite duzun hortan
hormak pitzatzen jo ta su,
zure atzean bultzaka
herri osoa daukazu.
Azkenik, Miren Larrarteri berari egokitu zitzaion hitz egitea, eta biziki eskertu zuen jasotako omenaldia. Ekitaldira joandako guztiekin ateratako argazkiarekin eman zioten amaiera omenaldiari.
