Euskal selekzioarekin lehiatu da Miren Larrarte Munduko Wallball Txapelketan, Leeuwarden (Herbehereak). Hain justu, erakustaldia egin du euskal selekzioak: bost mailatan aritu da, eta lautan nagusitu da, lau urre eta hiru zilar lortuz. Hiru domina Larrarterentzat izan dira. Binakako mistoan irabazi du urrea, Ziarrustarekin batera, 21-19 eta 21-15 irabaziz Jurrit Osinga eta Marrit Zeinstra herbeheretarrei. Banakakoan selekzioko kide baten aurka galdu du bidaniarrak finala: Olatzz Arrizabalagak irabazi dio neurketa estu batean: 21-16, 3-21 eta 11-6. Beste zilarra Arrizabalagarekin bata lortu du, binakakoan, finala Marrit eta Hiske Zeinstra Herbehereetako ahizpen kontra galduz: 21-14 eta 21-12.
Wallballeko lehiaketa bateratu bat egin duten lehen aldia da. Esku Pilotako Nazioarteko Konfederazioak antolatu du, eta zazpi herrialdek hartu dute parte: euskal selekzioak, Argentinak, Belgikak, Erresuma Batuak, Valentziak, Herbehereek eta Puerto Ricok.