Euskal Herriko XV. Bakarkako Sega Ligari hasiera emango diote igande honetan, 12:00etan, Goiatzen. Almitza Sega Elkarteak antolatu du beste behin, eta guztira hiru saio izango dira ligan. Goiatzeko hitzorduaz aparte, beste biak Etxalekun, ekainaren 14an, eta Hernanin, ekainaren 28an, egingo dira. Guztira eskualdeko hogei segalarik parte hartuko dute aurtengoan. Hiru probetako emaitzek erabakiko dituzte Bavarian (Alemania) jokatuko den Europako Sega Txapelketa parte hartuko duten euskal ordezkariak.
Emakumezkoetan Jugatx Agirre Zubizarreta berastegiarra, Luixa Uzkudun leaburuarra, Sheyla Sarasola lizartzarra, Alaitz Imaz hernialdearra eta Ainara Otamendi ibartarra ariko dira. Gizonezkoetan Mikel Lizartza tolosarra, Oier Urkola anoetarra eta Amaiur Arrospide leaburuarra, eta gizonezko beteranoetan Joakin Garmendia anoetarra eta Koldo Arzellus tolosarra. Emakumezkoetan, gazteen mailan, 14 eta 18 urte bitartean, hiru parte hartzaileak eskualdekoak dira: Inge Goikoetxea eta Lorea Zunzunegi gazteluarra, eta Izadi Arrospide leaburuarra. Haurretan, 14 urte azpikoetan, Gazteluko zazpi segalarik parte hartuko dute: Haizea Larrañaga, Xare Iriondo, Irati Tome, Mari Olazar, Claudia Pellus, Xuban Gartzia eta Aner Zunzunegi.