Aurten ere koplak abestera aterako dira Santa Ageda bezperan, otsailaren 4an, Bidania-Goiatzen. Kukuri kultur taldeak antolatuta, bertsolari eta trikitilariek lagunduta ibiliko dira kalez kale, eta saioa prestatzeko entsegua egingo dute urtarrilaren 30an, 21:00etan, Txinkorta ikastetxean. Antolatzaileek herritar guztiak gonbidatu dituzte bertan parte hartzera.
Otsailaren 4an 17:30ean abiatuko dira Goiazko frontoitik eta herriko txoko zein bazterretan abestu ondoren, iluntzean afaria egingo dute parte hartzaileek. Bertan jateko, ordea, beharrezkoa da aurretik izena ematea 625 707 094 edo 605 753 355 telefono zenbakietan, antolatzaileek aurretiaz jakin behar baitute kopurua janaria prestatzeko. Datorren astelehena, urtarrilaren 27a, izango da izena emateko azken eguna.