Bost egunetan, San Bartolome jaietan murgilduko dira bidaniarrak. Umeen jolasekin eta txupinazoarekin batera emango diete jaiei hasiera Bidanian. Lehen egunean zehar, txikiteo herrikoia egingo da trikitilariek alaiturik, eta gauean, herri afaria eta Muxutruk taldearekin gozatzeko aukera izango da.
Bigarren eguna, kirol ikuskizunez eta bertsolariekin gozatzekoa izango da. Herriko umeak eskuz eta palan jokatuko dituzte partidak lehenik, eta ondoren, helduen txanda izango da. 22:30ean emango zaio hasiera bertso jaialdiari, eta egunari itxiera emateko, Izer eta Alabierren erromeria izango da entzungai.
Abuztuaren 23a, larunbata, III. Paella Lehiaketarekin hasiko da. Arratsaldean, Ttek elektrotxarangak alaituko ditu Bidaniko kaleak, eta gauean berriz, Bidaniko gazteak legazpiarren aurkako desafioan lehiatuko dira.
Larunbatari ekiteko, herriko dantzarien saioa egingo da 11:30ean. Arratsaldean, mus txapelketak hartuko die dantzariei erreleboa, eta behin txapelketa amaituta, sagardo afaria egingo da jendearen zintzurrak bustitzeko. Gauean, Gabezin taldea eta DJ Hidalgo izango dira oholtza gainean musikari lanetan.
Azken egunean, jai guztietan pilatutako ajeari buelta ematen hasteko, txapelketaz, desafioaz eta herri kirolez beteriko eguna izango dute Bidanian. Ikusmin handiena Bidaniko eta Tolosako gazteen arteko desafioak piztuko du herritarren artean.
