Bidaniako San Bartolome jaien hirugarren eguna da gaurkoa. Herritar askorentzat egun handia da, eta hala erakutsi dute goizean goizetik. Bidaniar ugari bildu dira eliza inguruan; izan ere, eliza atarian jokatu baita toka txapelketa. Elizaren beste aldean, berriz, bolatokian, bola txapelketa jokatu dute. Punteria doitzen aritu dira, ondoren zetorrenari aurre egiteko.
Behin txapelketak amaituta, 12:00ak aldera, frontoian bildu dira denak, ordu horretan eman baitiote hasiera I. Paella Lehiaketa Herrikoiari. Festen historian lehen aldiz egin dute lehiaketa, eta arrakasta handia izan du. 33 taldek eman dute izena, eta herritarrek, familian, kuadrillan edo ezagunekin batera hartu dute parte. Gainera, adin guztietako herritarrak aritu dira sukaldari lanetan.
Paella Lehiaketa amaitu ondoren, sariak banatu dituzte, eta ondorengo herritarrek eraman dituzte garaikurrak etxera:
- Paella Lehiaketako txapeldunak: Igaratz Azkarai eta Ainhoa Aldalur.
- Emakumezkoen Bola Txapelketako txapelduna: Eneritz Iraola.
- Gizonezkoen Bola Txapelketako txapelduna: Ramon Labaka.
- Emakumezkoen Toka Txapelketako txapelduna: Miren Larrarte.
- Gizonezkoen Toka Txapelketako txapelduna: Ander Zinkunegi.
- Haurren Toka Txapelketako txapelduna: Unax Aburuza.