Bidania-Goiazko Udalak gaur Uemako kide izatea onartzen badu, Uemako 93. udalerria izango litzateke Ibarra herriaren atzetik. Honenbestez, Tolosaldeko hogeita batgarren herria izango da Ueman.
Euskal Herrian Euskaraz elkarteak 1988. urtean abiarazi zuen proiektua, hainbat udaletan aurkeztu zuen mozio batetik sortu baitzen Udalerri Euskaldunen Mugimendua. Mozio hark herri euskaldunetako udalek euskara hutsean lan egitea proposatzen zuen, eta Euskal Herriko 32 udalek onartu zuten. Mozioarekin batera, Euskararen Erabilpena Normaltzeko Udal Arautegia onartu zuten, administrazioan eta udalerrietan euskaraz bizitzeko eskubidea bermatzeko eta bitartekoak jartzeko asmoarekin.