Taldean sartu ahal izateko, berriz, bakoitzak dokumentu bat bete behar du, eta udaletxean entregatu. Zenbakia sartzeko baimena emateaz gain, bertako puntuak onartu beharko ditu norbanako bakoitzak.
«Herritarrek ere idazteko ahalmena izango duzue, beti ere, interes orokorra duten mezuak idatziz: oharrak, elkarteen agendak, deialdiak, emergentziak, ...», azpimarratu dute udaletik. Era berean, lau puntu zehaztu dituzte: mezu guztiek Bidania-Goiazko eta herritarrentzako interes orokorra izan beharko dute; ez da eztabaida talde bat, mezuak ez dira erantzun edo eskertu beharko; errespetuz jardun beharko da beti, ezberdina errespetatuko duen herrigintzarako talde bat da; eta udaletxean egin beharreko eskaera edo kexa guztiak, orain arte bezala egin beharko dira, Whatsapp talde honek ez du betebehar legalik izango.
Jakinarazi dute etxez etxeko banaketa orain arte bezala mantenduko dutela.