Azokarekin amaitu da XXIX. Kultur Astea

Tolosaldeko Ataria 2018ko ira. 30a, 17:35

Ohitura den bezala, Goiazko plazan ospatu den Azoka Bereziarekin eman diote herritarrek amaiera aurtengo Kultur Asteari. Denetik izan da bertan: taloak, trikitilariak, sardinak, eta zenbait salmenta postu ere.

Goiz guztian zehar, produktu desberdinen erakusketa eta salmenta izan da bertan: esnekiak, ogia, arropa, loreak edota bestelakoak ikusi, dastatu eta erosteko aukera izan da. Horiez gain, herritarrek ere postre eta barazkien postuak jarri dituzte.

Eguraldia lagun, jende asko gerturatu da plazako postuetara, eta horietako batzuk ere ausartu dira kalabazaren pisua asmatzeko lehian parte hartzera. Jateko, taloak eta sardinak jarri dituzte salgai; edateko, berriz, txakolin eta sagardo tragoak izan dira eskuragarri. Trikitilariak izan dira goiz guztian zehar bertako giroa alaitzen, eta azokari musika jartzen. Arratsaldean ere entzun dira trikiti doinuak bertan. Ondorioz, aurtengo Kultur Asteari amaiera ezin hobea eman diote gaurko egunarekin.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!