Goiaztarrak aurreratu egingo zaizkie Bidaniarrei, eta abuztuko bigarren asteburuan ospatuko dira Andra Mari Jaiak bertan, suziri eta ezkilekin hasiera emanez. Arratsaldean, XV. mus txapelketa jokatuko dute, egunean bertan, elkartean, izen ematen dutenek. Gauean, Itzeder eta Lidiarekin, erromerian dantza egiteko aukera izango da, afariko jan eta edanak erretzeko asmoarekin.
Igandean, berriz, meza nagusiarekin jarraituko du festak, eta gero, poteo herrikoiarekin batera, dantza emanaldia ikusteko aukera izango da. Arratsaldean, izen eta zapore ezberdinetako sagardoak dastatuz, aurreko egunean xahututako indarrak berreskuratu beharko dituzte herritarrek, gauean, Izer, Alabier eta Lutxurdiorekin erromerian gorputza mugitzeko.
Badirudi, astelehena izan daitekeela, aurten, egunik lasaiena. Arratsaldera arte ez dute ezer antolatu, eta haurrak eta jolasak uztartuko dituzte orduan. Bide Batez taldearekin erromeria izango da gauean, eta atsedenean helduko da jaietako une berezia: traktore igoera. Plazan egingo da, parte hartzaileek, 33 metroko ibilbidea osatu beharko dutelarik.
Baina, guztia ez da astelehenean amaituko eta asteartean ere jarraituko du festak, goizeko meza nagusiarekin eta paleta eta pilota partidekin. Arratsaldean, berriz, goi mailako harri-jasotzaileak, aizkolariak trontzalariak eta lokotx biltzean arituko diren lasterkariekin, proba bikainez gozatzeko aukera izango da. Gauean, berriz, Irati eta Maialen trikitilariek jarritako doinuekin oinak astinduz eta eskuak altxatuz esano diete agur Andra Mariei.
Ikusi hemen egitaraua.