Urtero legez, pilota partidak izan ziren Andra Mari egunean, Goiazko pilotaleku xumean. Lehenik, Aingeru Senperena eta Beñat Lizaso aritu ziren palaz, gurpildun aulkien gainean; Beñat nagusitu zitzaion Aingeruri 22 eta 19. Bigarren partidan, Maite Larrarte eta Nerea Ruiz bikoteak 30 eta 26 irabazi zion, Miren Larrarte eta Goretti Aburuzak osatutako bikoteari. Azken partida eskuz jokatu zuten, eta Anartz Dorronsoro eta Ander Iraetak irabazi zuten 22 eta 13, Alex Altuna eta Iker Larrarteren aurka.
Arratsaldean, Bidania eta Goiatzeko herritarrak nor baino nor aritu ziren herri kiroletan. Herritarrez gain, aizkolari eta harri jasotzaile ezagunak ere lehiaren parte izan ziren. Herritarrak trontzan, korrika, lokotx biltzen, ingudean, eta txingatan aritu ziren; Bidaniako gazteak izan ziren garaile. Ikusmin handia piztu zuen lehiatik harago doan lagunarteko norgehiagokak.