Legealdi honetan hasi nahi dute udaletxea berritzen

Bidania-Goaizko aurtengo udal aurrekontua 672.345 eurokoa da, udalbatzan aho batez onartua. Inbertsio errealetarako 209.000 euro bideratuko dira, eta horietan nabarmentzekoak dira herri bideetara, udaletxea eraberritzera eta Bidaniako hilerria eraberritzera bideratutako kopuruak.

Udaletxea eraberritzea da udalak mahai gainean duen proiektu garrantzitsuenetako bat. Proiektua 2007an egin zen, diru laguntza bat tarteko, eta 600.000 euro inguruko aurrekontua atera zen. Joxe Erramun Goikoetxea alkateak azaldu duenez, «proiektu horri aldaketa batzuk egitea eskatu zaio udal teknikariari. Igogailua jarri nahi da eta igogailuak zerbitzua ematea bai udaletxeari eta baita Kontseju taberna-jatetxeari». Irisgarritasunean pausoak emateaz gain, udaletxea osotasunean eraberritzea da asmoa.

Goikoetxeak gaineratu duenez, «gure asmoa da legealdi honen barruan behintzat hasiera ematea, eta izango duen martxa finantziazioak baldintzatuko du, eta horretarako harremanetan gaude aldundiarekin. Herri txiki honetan finantziaziorik ez badago, gauza gutxi egin ahal izango da». Horrela, udal aurrekontuetan diru kopuru bat bideratu dute. «Ez da kopuru handia, baina zerbait egiteko balioko du. Behar handia dagoela ikusten da. Ea beste alde batetik ere etortzen den zerbait», adierazi du alkateak.

Bestalde, Bidaniako hilerrian konponketa garrantzitsua egingo da. Hilerriko pareta kanpoaldetik eta zorua saneatuko dute. Herri bideei dagokionez, mapa bat egina dago, eta udalaren asmoa da bidez bide egoera zein den ikustea, eta ahal den heinean txukundu bat ematea. 

Txinkorta eskolako estalpea egina dago, eta hor udalak bere ekarpena egin du. «Hasiera batean estalpea jarri da, haurrak busti gabe jolasteko. Gero ikusi beharko da ea argiteria jarriko den edo pixka bat itxiko den, haizeak jotzen duenean korrontea sortzen delako», esan du alkateak.