Berrobiko Begi-gorri gaztetxeak antolatuta, azaroaren 15etik 29ra bitarte jokatuko da 33. Ion Ander Izagirre Frontenis Txapelketa. Lau kategoria izango dira: gizonezkoen banakakoa eta binakakoa, emakumezkoen binakakoa eta bikote mistoena.
Izen ematea zabalik da azaroaren 6ra arte, eta Iriarte jatetxean edo Lakarie dendan egin behar da. Jokalari bakoitzak 10 euro ordaindu behar du. Kanporaketak azaroaren 7an zozkatuko dituzte, 18:00etan, gaztetxean.
Haurren IV. Frontenis Txiki Txapelketa ere antolatu dute. Azaroaren 8an eta 9an izango dira kanporaketak, eta finalak, 29an. Hiru maila izango dira: LH 1 eta LH 4 maila artekoen banakakoa –frontoiko atzeko txokoan–, eta LH 5 eta DBH 2 maila artekoen banakakoa eta binakakoa. Azaroaren 4a baino lehen eman behar da izena, Lakarien edo Iriarten.