San Agustin jaiak ospatzen dituzte Berrobin, eta aurten, eguna bera abiapuntu hartuta, bost egunez festan ibiltzeko moduan izango dira. Aurtengo jaiak ere herriko eragile ezberdinen artean antolatu dituzte, eta inoizko festarik luzeenak izango dituzte.
Jaien bigarren egunean, II. Mozorro Lehiaketa eta Sagardo Dastaketa izango dira eguneko ekitaldi garrantzitsuenak. Mozorro onenaren lehiaketa irabazten duenari saria emango zaio aurten ere. Hurrengo egunean, Ibin kirol klubekoek antolaturiko Berrobiko III. Futbito Txapelketa jokatuko da, eta egitasmo honen helburua herriko gazteak ekintzak egitera bultzaraztea da. Eguna amaitzeko, herri afaria egingo da herriko plazan.
Gaztengana bueltan etorrita, aurten, abuztuaren 31n, Gazte Eguna egingo dute. Paella lehiaketa eginez emango diote hasiera egunari, eta egunean zehar hainbat ekintza antolatu dituzte: bazkaria, herri jolasak, kontzertuak... Kontzertuen artean, sona handiko Los Zopilotes Txirriaos taldea aurkitzen da, besteak beste.
Azken egunean, pilota eta dantza txapelketak egongo dira ikusgai herritarrentzat. Mus txapelketak ere izango du bere zeresana, eta parte hartu nahi duenak Bide Ona elkartean izena eman beharko du, 16:00ak baino lehen. Txapelketetako nekeak arintze aldera, erromeriek zein txarangek alaituko dituzte Berrobiko kaleak. Azkenik, zahagiardoarekin emango zaie amaiera San Agustin jaiei eta baita Tolosaldeko abuztuko jaien maratoiari ere.
