Ekitaldi hunkigarria izan dute gaur, Berrobin. Izan ere, erretiroa hartzera doan Iturriza janari dendako arduraduna den Kandi Iturriza omendu dute herritarrek. Duela 50 urte baino gehiago zabaldu zituen ateak Berrobiko Iturriza janari dendak. Brigida Intxaustik izan zuen horren ardura Martin Iturriza senarraren laguntzarekin, eta gaur egun, haien alaba Kandik du dendaren ardura.
Herriko plazan egin dute hitzordua eta herritar ugari izan dira bertan, heldu zein gazte. Ekitaldia hasteko suziria bota dute eta ondoren dendako atarira gerturatu dira. Hain justu, atzo, Iturrizaren urtebetetze eguna izan zen eta Zorionak zuri abestu diote lehenik. Ondoren, herritarrek prestatutako bertsoa abestu eta bere senideek Agurra dantzatu diote. Lore sorta ere eman diote eta Aitzol Izquierdo alkateak oroigarri bat eman dio, herriaren esker ona adieraziz.
