Udazkeneko azokak aukera paregabeak izaten dira zereginak aurreratu eta gabonetako opariak erosteko, baita herriko zein inguruko ekoizleen lana babestu eta bultzatzeko ere. Eskualdean baditugu ospakizun data hauetan antolatzen diren gabonetako azoka ugari eta herritar asko izaten dira horiekin bat egiten dutenak. Horren adibidea da igandean Berrobiko plazan egingo duten azoka.
Orain arte, azoka udaberrian soilik egiteko ohitura zutela esan du Aitzol Izquierdo alkateak, «baina beste herrietan garai hauetan azokak egiten direla ikusi eta Berrobin ere egitea erabaki genuen». Iaz egin zuten udazkeneko lehena eta horren arrakasta ikusita jarraipena ematea erabaki dute aurtengoan. Honela, 20 postu izango dira denera igandean. Herriko eta inguruko baserritarren produktuak eta artisauen lanak izan dira eskura, eta gose dagoena mokadutxo baterako aukera ere izango du.
Alkateak igandean plazara azaltzeko deia egin die herritarrei, «horrek ematen baitio bizia herriari, eta bakoitzak bere neurrian bere ekarpena egin dezala».