Guraso elkarteak antolatuta «galdu ditugunak, urrundu direnak eta gure bihotzean daudenak» gogoratzeko ekitaldia egin zuten pasa den ostiralean. Ekitaldi xumea egin zuten eta hunkigarria izan zen oso. Bittor Madinak heriotzaren inguruan hitz egin zuen eta Himalayako mendietan egin ohi den moduan, mezuak zituzten koloretako zapiak zintzilikatu zituzten, haizeak eraman zitzan. Era berean, krabelin zuriak jarri zituzten zuhaitzaren oinean. Bukatzeko, ikasleek jarritako plaka batean dagoen bertsoa abestu zuten eta herriko txarangarekin joan ziren plazara ekitaldiari amaiera emanaz.