Atzo arratsaldean aurkitu zuten sei egunez desagertuta egon den Berrobiko 33 urteko gaztea, eta David de Miguel Berrobiko alkateak esan duenez, "oso albiste ona" da herriko bizilaguna "egoera onean" aurkitu izana.
Berrobiko Udalaren izenean "eskerrak eta zorionak" eman dizkie berrobitar guztiei eta boluntario taldeei, herritarra bilatzeko lanetan izandako mobilizazioa nabarmenduz: "Herri gisa, elkarlanaren eta inplikazioaren eredu izan gara. operazio hau koordinatu duten pertsonek aitortu dute gutxitan aurkitzen dituztela hain boluntario motibatuak eta elkartuak, eta, aldi berean, mendian bilatzeko esperientzia dutenak".
Era berean, Eusko jaurlaritzako Babes Zibileko Zerbitzuak koordinatu duen dispositiboa eskertu nahi izan du. Bestetik, Ertzaintzaren hainbat unitateei, Gipuzkoako Suhiltzaileei, Gurutze Gorriari eta DYAri ere, besteak beste, eskerrak eman dizkie. Eta baita desagerpenaren berri eman duten hedabide zein boluntarioei jaten eman dieten taberna eta jatetxeei ere.
Boluntarioek bilaketa lanak "ahalik eta baldintza onenetan egiteko" beharrezkoak izan diren baliabide guztiak aktibatu ditu udalak. Eta hor, Berastegiko Udalaren laguntza eskertu du.