Argazki lehiaketa martxan da Berrobin. Aurten, lehen sektorea izango dute gaia, zehazki, nekazaritza, abeltzantza edota basogintza. Bi kategoriatan banatu dute lehiaketa: gazteen kategorian 14 urte artekoek hartuko dute parte eta hortik gorakoek helduen kategorian lehiatu beharko dute. Parte hartzaile bakoitzak 3 argazki bidali beharko ditu argazkiaren izenburua, egilearen adina eta izen abizenak jarrita.
Argazkiak bidaletzeko azken eguna ekainaren 6an izango da, eta liburutegia@hotmail.com helbidera bidali beharko dira. Antolatzaileek esan dutenez, argazkiak argazki kamerarekin egitea hobesten da.
Argazki guztiak liburutegian jarriko dituzte ikusgai ekainaren 8tik aurrera. Kategoria bakoitzean hiruna sari banatuko dituzte, eta sari banaketa ekainaren 15ean izango da, 18:30ean, liburutegian.