Kontratuak urtebeteko iraupena izango du, eta sei hilabeteko probaldia finkatu dute. Urtero, ordea, urtebetez luzatzeko aukera eskainiko dute, gehienez hiru urte bete arte. Gainera, esleipendunak udalari ez dio inolako kanonik ordaindu beharko taberna ustiatzeagatik.
Lehiaketan parte hartzeko dokumentazioa udaletxean kontsultatu ahal izango da, iragarkia Gipuzkoako Aldizkari Ofizialean argitaratzen den egunaren biharamunetik hasi eta hogei egun naturaleko epean.
Udalak erabakiko du zein izan den proposamenik egokiena, eta nori esleitu zerbitzua, eskaintzaren balio ekonomikoa kontuan hartzeko beharrik izan gabe. Aurkeztutako eskaerak baloratzeko honako alderdi hauek hartuko dituzte kontuan: aurretiazko esperientzia, erretiratuentzako jardueren egutegia, euskara ezagutzea eta Berrobin erroldatuta egon eta bizitokia bertan izatea.