Tolosa Crossfit izeneko gunean, Usabal industriagunean, egin dute saioa berrobitarrek. Bertako nagusietako bat da Mikel Perez Artola, eta berak azaldu duenez, "intentsitate handitan egiten diren mugimendu funtzionalak dira. Duen ezberdintasuna da intentsitate oso altutan egiten ditugula ariketak, eta batetik bestera pasatuz. Aerobikoki asko eskatzen duena da".
Iker Elustondo berrobitarra Tolosa Crossfiten hasi zen ireki zutenean. "Pertsonalki gustuko dut eta lagun batzuk bazuten kuriositatea probatzeko, eta Berrobin kirol kluba dugunez, aprobetxatu dugu saio bat egiteko eta jendeak ezagutzeko", esan du Elustondok. Hainbat ariketa mota ezberdina egin dituzte, tartean bizikletan, arraunean, kutxa bat igotzen, korrika egiten... Gustura aritu dira bertaratu diren berrobitarrak, eta izerdi pixka bat botatzeko aukera ere izan dute.