Opor hauek herrian aprobetxatu nahi dituenak, badu aukera Berrobin. Ia egunero dute zerbait egiteko, izan kirola, tailerra edota jolasa. Gaur goizean, haurrentzako jolasak egin dituzte ingelesez.
Bihar, berriz, 18:00etan hasita, belaunaldien arteko Laister chef tailerra antolatu dute Bide-Ona elkartean. Aiton-amonek plater goxoak prestatzen erakutsiko dizkiete gaztetxo eta haurrei. Jarraian, afari-merienda egingo dute prestatutakoekin.
Ostiral arratsaldean, patinaje ikastaroa izango da eskolako estalpean, 18:30ean. 18:30ean 4 eta 8 urte bitartekoak arituko dira, eta 9 urtetik gorakoek 19:30ean izango dute zita.
Urtea amaitzeko, berriz, bizikleta itzulia egingo dute Baliarraingo Ibiur urtegira. 24 kilometroko ibilbidea osatuko dute 9:00etan hasita. Bitartean, txikienek psiko-saltoa izango dute: jauzika jolastea, akrosport, zapi zuria, hitz debekatua eta telefonoaren jolasa egingo dituzte.
2019. urtea behar bezala hasteko, Uzturrera egingo dute ibilaldia 9:00etan, eta ondoren, hamaiketakoa izango dute. Urtarrilaren 2an, berriz, margotzea, papiroflexia eta buztinarekin eskulanak egitea aurreikusi dute.
Hurrengo egunean, 2an, Iruñeako Salting parkera egingo dute bidaia. 14:00etan abiatuko dira Berrobitik, eta 5 euro ordaindu beharko ditu bakoitzak. Azkenik, urtarrilaren 4erako, karting-eko kotxeak, pedalezkoak eta gasolinazkoak, ekarriko dituzte.
Azkenik, urtarrilaren 5ean, Errege magoen desfilea izango dute. 16:00etan elkartuko dira Begi-Urdin Gaztegunean ohiko bilketa egiteko. 18:00etan paje laguntzaileek indar-berritzeko askaria egingo dute, eta 19:00etan iritsiko dira Errege magoak herriko plazara. Opari banaketa eta zozketak egingo dituzte.