Maialen Muñoz ibartarrak 29:45eko denbora egin du; bigarren Oihana Ortiz tolosarra izan da, 30:00rekin, eta hirugarren Lourdes Colomo zizurkildarra 30:18rekin. Aitor Regillaga tolosarrak 24:06 egin du; Raul Gomez lasartearra bigarren helmugaratu da 24:11rekin, eta Iban Madina berrobitarra 25:49rekin hirugarren izan da. Berrobiko podioa ere egin dute, eta emakumezkoetan lehenengo hiruak Iosune Alberdi, Arantxa Garin eta Agurtzane Belauntzaran izan dira; gizonezkoetan Ibai Madina, Jon Altuna eta Mikel Belauntzaran.
Maialen Muñozek aurretik irabazi izan du lasterketa:"Orain dela urte dezente parte hartu nuen eta irabazi ere. Orduan abuztuan izaten zen. Egia esan oroitzapen onak dauzkat". Garaipena lortzeko sufritu duela esan du: "Hasieran bi neska atera gara nahiko paretsu eta gero aldapa gora erritmoa azkartu dut eta aurreratu egin naiz. Pixkana izan da, baina kostata. Gainera beroa egin du eta asko sufritu dugu".
Berrobiran bere lehen garaipena lortzeko, Aitor Regillagak lehia estua izan du Raul Gomezekin, bukaera arte batera aritu baitira. "Gogorra izan da lasterketa. Alde batetik sekulako beroa egin duelako, eta gero Raulek hasieratik erritmo oso gogorra jarri duelako". Regillaga lehen itzulietan bere erritmotik kanpora eraman du Gomezek: "Zortez erritmoa jaitsi du pixka bat hirugarren itzulian eta nire erritmoan jarri naiz, eta gero bukaeran irabazi egin ahal izan diot. Lasterketetan beti elkarrekin ibiltzen gara, batzuetan ni aurretik, besteetan bera, baina oso paretsu ibiltzen gara eta beti azkeneko metroetan erabakitzen da elkarren arteko norgehiagoka". Berrobiko krosaren zirkuitua polita iruditu zaio: "Ezberdina da, gorabeheratsua da, eta gogorra egiten da, baina leku ezberdinetatik joaten da eta gustatu zait".
Zirkuituari bost buelta ematen dizkiote Berrobiran, eta guztira 7,5 kilometro egiten dituzte. Antolakuntzatik gustura azaldu dira, parte hartzaileen kopurua handitu egin delako. Iaz, helduen proban 31 korrikalari atera ziren, eta aurtengoan dezente handitu da kopurua, 56ra iritsiz.