Ibarrako jai entzutetsuen itzalean, baina inbidiarik gabe, berrobitarrek hasi dituzte, azkenean, hainbeste itxarondako festak: sanagustinak.
Suziriak iragarri du jaien hasiera, nola bestela, eta 2017ko protagonistak telebistaren bidetik iritsi dira, Berrobiko udaletxeko balkoira: ETB 1eko Herri txiki, infernu handi saioan parte hartu zuten herritarrek iragarri dute festaren hasiera.
12:00etan puntuan entzun da lehen suziria, eta jarraian iritsi dira beste hainbeste. Bakoipean zeudenek gora begiratzen zuten, suziriak utzitako arrastoari segika, lehenengo, eta gozokiak noiz iritsiko, gero; lehia bizia izan da neska-mutilen artean.
Hori, buruhandiak iritsi bitarte, noski: orduan belztu dira zenbait kopeta, eta mugitu zenbait gaztetxoren oinak. Sanagustinak hasi besterik ez dira egin, eta astelehenera bitarte, berrobitarrek badute zer ospatua.
