Atzo, ikasturtean zehar judoa ikasten aritu ziren hamabi urtetik beherako ikasleen erakustaldia izan zen eskolan, eta eskolako gimnasia lekua ikuslez lepo bete zen.
Gaur, berriz, Mikel Ozaita ibartarra izango da liburutegian hizkuntza ekologiari buruzko hitzaldi bat eskaintzen. Saldiasen esanetan euskararen inguruko hausnarketa berri batzuk egiteko gune aproposa izan daiteke: «Ohituta gaude bakarrik entzuten zaharra den, zer garaitakoa den, ikasteko erraza al den edo hizkuntza erabiltzen dutenen kopurua handitzen ala txikitzen ari den. Askotan datu horiek jakitera bakarrik mugatzen gara, eta ez horrek zer eragin izan lezakeen jakitera. Adibidez, euskara zein lotuta dagoen bizi garen inguruneari, euskara galera horrek ingurune hori galtzea dakarrela... Zentzu biribilago batetik hizkuntza ikustea da, eta ez bakarrik momentuko elkarrizketatik aterako gaituen tresna bezala». Jendeari egunero erabiltzen duen tresna horrek zer nolako «garrantzia» duen jakitea gustatuko zaiela uste du Saldiasek.
Horrez gain, ordea, bestelako hitzordu asko ere badituzte aurretik berrobitarrek. Esaterako, igandean, V. Udaberriko merkatua izango da 10:00etatik 14:00etara, eta bertan herriko nahiz inguruko hainbat produktu topatzeko aukera izango da mota guztietako postuetan: bertako produktuak, artisauak, Marokoko gozoak, kuskusa, tea, henna, margolariak, karikaturak, zozketa....
XXVI. KULTURALDIA
Gaur, maiatzak 18
18:00. Mikel Ozaita: Hizkuntza ekologiaren inguruko hitzaldia liburutegian.
Bihar, maiatzak 19
17:30. Gimnasia erritmikoko ikasleen emanaldia.
18:30. Literatur lehiaketako sari banaketa udal liburutegian.
Maiatzak 20, ostirala
10:00 eta 17:00. Eskolako ikasleen musika eta antzerki emanaldia..
22:00. Bakarrizketa saioa, Ester Povedarekin Iriarten.
Maiatzak 22, igandea
10:00-14:00. V. Udaberriko Merkatua.
18:00. Dantza emanaldia.