Emakumearen Nazioarteko Eguna izendatu zuen martxoaren 8a, Nazio Batuen Erakundeak 1977an, eta egun horren harira gure eskualdean ere hainbat ospakizun izaten dira. Hain zuzen ere, emakumea eta historia bateratuko dituzte Berrobin, Toti Martinez de Lezea idazleak eskainiko duen hitzaldian, 19:00etan, Berrobiko Udal Liburutegian.
Hainbat galdera utzi dituzte zintzilik antolatzaileek: «Zein da Euskal herrian emakumearen bilakaera historikoa? Kristautasuna baino lehenagoko sinesmenetan, esaterako, zer paper jokatzen zuen emakumeak? Zein ziren sorginak, eta zer dela eta hil zituzten inkisizio garaian?».
Toti Martinez de Lezeak euskal mitologiaren arloan emakumearen presentziaren inguruko lanketa handia egin du, eta Berrobi bizia ekimenaren baitan antolatutako hitzaldi honetan «emakumearen ahalduntzea lantzeko bideak eskainiko dira», horretarako «aurrekari eta bestelako gertakari historikoen laburpena» eginez.
Hitzaldia erabat irekia eta doakoa izango da, baina antolatzaileek eskertuko lukete lehenago izena ematea. Horretarako bi bide daude: 943 68 32 94 telefonoa eta www.berrobibizia.eus web orria.
Bestalde, larunbat honetan Berrobi bizia ekimenak txokolate jatea antolatu du, txurro eta guzti. 17:30ean izango da, Solastoki kafetegian.
Emakumea eta historia landuko ditu Toti Martinez de Lezeak Berrobin
Emakumearen egunaren harira Berrobi bizia ekimenak idazlearen hitzaldia antolatu du gaur, liburutegian
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!