Eusko Jaurlaritzaren Gobernu Kontseiluak onartu du gaur, ia 10 milioi euro bideratzea udalekin elkarlanean ikastetxe publikoak hobetzeko. Akordioak Euskadiko 91 udalerritan jarduketak egitea aurreikusten du: 3,49 milioi Gipuzkoarako, 5,43 milioi euro Bizkairako eta 1,06 milioi Arabarako. Hezkuntza Sailaren eta udalen arteko lankidetzari esker, baliabideak optimizatu eta obrek eskola jardueran izan dezaketen eragina murriztuko dela esan du Eusko Jaurlaritzak. Udalekin lankidetza hitzarmenak sinatuko dituzte, jarduketa horiek elkarrekin finantzatu eta gauzatzeko. Finantzaketa bi aurrekontu ekitalditan banatuko dute: 1.495.727,64 euro 2026ari dagozkio, eta 8.475.790 euro 2027ari.
Gipuzkoarentzat aurreikusitako 3.488.399,10 euroak 29 udalerritara bideratuko dituzte, eta ekarpen handiena jasoko dituzten herrien artean dago Berastegi; 399.939 jasoko ditu.
Administrazioen arteko lankidetza
Hitzarmenen bidez, Hezkuntza Sailaren eta udalen eskumen eremuei eragiten dieten obrei elkarrekin ekingo zaie, eraikinen kontserbazio, eta mantentze, hobekuntza eta egokitzapen inbertsioekin uztartuz.
Udalek obrak izapidetu eta gauzatuko dituzte, eta obren zuzendaritza teknikoa kontratatuko dute. Hezkuntza Sailak, berriz, hitzarmenetan adostutako ekarpen ekonomikoak egingo ditu.
Lankidetza-formula horri esker, jarduketen bikoiztasunak saihestu, esku-hartzeak arindu eta baliabide publikoen erabileran eraginkortasun handiagoa lortuko dutela esan dute. Gainera, hitzarmenek ezartzen dute obrak, ahal den neurrian, irakaskuntza jarduerarik gabeko udako aldietan egingo direla, ikastetxeen ohiko jardueran ahalik eta eragin txikiena izan dezaten. Helburua da ikastetxe publiko seguruagoak izatea, egungo behar pedagogikoetara egokitutako espazioekin eta ikasleen ikaskuntzarako eta ongizaterako baldintza hobeekin, sare publikoan aukera berdintasuna bermatuz.