Udalbiltzaren Geuretik Sortuak ekimenaren hirugarren edizioan parte hartuko du Berastegiko Udalak, eta edizio honetako hainbat arte-diziplinetan egindako lanen aurkezpen erakusketa izango da ikusgai egunotan udaletxeko erabilera anitzeko gelan. Gaur, bihar eta etzi, 08:00etatik 15:00etara eta 16:00etatik 19:00etara, eta martxoaren 16an, 08:00etatik 15:00etara izango da zabalik.
Geuretik Sortuak
Ekimen hau euskara hutsean egindako artea eta kulturaren sormena, ekoizpena eta hedapena sustatuko dituen zirkuitu nazionala da. Lehen bi edizioei esker, zazpi lurraldeetako hainbat herritara iritsi dira 40 euskal sortzaile baino gehiagoren lanak, lau arte-diziplinatakoak. Euskal Herriko kontakizun afektiboa garatzen jarraitzeko, eta euskarazko sorkuntza eta sortzaileak Euskal Herriko bazter guztietara iritsi daitezen, Geuretik Sortuak ekimenaren hirugarren edizioa abiatu dute dagoeneko. Eskualdeko hainbat herriek parte hartuko dute, besteak beste, Berastegin, Ikaztegietan eta Villabonan izango dira emanaldiak. Informazio gehiagorako Udalbiltza.eus webgunean lor daiteke.