Realeko Aiara Agirrezabala eta Julia Arrula jokalariek Gipuzkoako Futbol Federazioaren saria jaso dute joan den udan Polonian jokatutako 19 urtez azpiko Europako Txapelketa irabazteagatik.
Federazioaren egoitzan egindako ekitaldi xume batean, dagokien garaikurra jaso dute. Julia Arrulak, Tafallako atezainak, 2021ean ekin zion bere ibilbideari Realean, eta urtebete geroago, Aiara Agirrezabala, Berastegin jaiotako defentsa, iritsi zen taldera. Joan den denboraldian Lehen Mailan debuta egin ondoren, gaur egun biak lehen taldeko partaideak dira.
Aitortza hori Izarne Sarasola ibartarrari eta Intxa Egiguren anoetarrari eman zaie aurretik, nazioarteko txapelketetan lortutako emaitzengatik.
Argazkia: Gipuzkoako Futbol Federazioa