Asteazkenean hasi eta gaur dute azken eguna Berastegiko festek. Goizetik izan dituzte jarduerak azken egunean ere, eta arratsaldean, ohi bezala, Berastegiko San Joan dantzak eta helduen soka dantza egin dituzte udaletxe parean.
Sargoria izan bada ere, airean altxa dituzte oinak gazte zein heldu berastegiarrek. Dantzen ostean bertsolariak eta zahagiardoa izango dituzte; eta eguna —eta, bide batez, festak— bukatzeko, berriz, 22:30ean Dantzerki emanaldia herritarren eskutik eta, ondoren, Larrañaga eta Ostolaza trikitilariak.
