Aiara Agirrezabalak 2029ko ekainaren 30era arte berritu du kontratua Realarekin. Atzo klubak jakinarazi zuenez, lehen taldearen fitxa eta 24 zenbakia izango ditu Agirrezabalak. Anoetan sinatu du kontratu berria, Joseba Ibarburu Realeko presidenteordearekin, Alex Uranga kontseilariarekin, Garbiñe Etxeberria emakumezkoen futbolaren arduradunarekin —irudian, eskuinean— eta Maider Castillo eliteko emakumezkoen futbolaren arduradunarekin batera —argazkian, ezkerrean—.
Berastegiko jokalariak 16 urte ditu eta, taldearen arabera, «heldutasuna eta zorroztasun taktikoa» erakutsi ditu zelaian «gaztea izan arren». Uda honetan 19 urtez azpiko Europako txapeldun izendatu da Agirrezabala Espainiako selekzioarekin.