Polonian jokatu berri da 19 urtez azpiko emakumeen Europako Futbol Txapelketa. Aiara Agirrezabala 16 urteko Realeko futbolari berastegiarrak txapelketan parte hartu du Espainiako selekzioarekin, eta txapeldun izan da, finalean Frantziari 0-4 irabazi ondoren.
Ezker hegaleko atzelariak lau partida jokatu ditu txapelketan, laurak osorik. Multzoen faseko lehen neurketan, 2-0 hartu zuten mendean Portugal, eta berastegiarrak egin zuen bigarren gola. Bigarren partidan, 1-0 galdu zuten Herbehereen aurka. Bi neurketa horietan, txartel horia ikusi zuen Agirrezabalak, eta ondorioz, ezin izan zuen hirugarren eta azken partida jokatu Ingalaterraren aurka, zigortuta zegoelako. 1-0 irabazi zuen Espainiako selekzioak.
Finalerdietan Italiaren aurka jokatu zuten. Luzapenean erabaki zen neurketa: 2-0 irabazi zuen Agirrezabalaren taldeak. Azkenik, finalean, 4-0 hartu zuten mendean Frantzia.