Berastegin Kultur astearen barruan egin dute udazkeneko produktuekin kontserbak egiteko tailerra. Urepele elkartean hogei bat herritar elkartu dira, eta Koro Artolaren eskutik, aingeru-adatsa eta marmelada nola egin eta kontserbatzen den ikasi dute. Melokotoiak, azenarioak eta sagarrak erabili dituzte marmelada egiteko eta, ondoren, produktuak probatzeko aukera ere izan dute bertaratu direnek.
Egitarauari jarraiki, eguerdian mus txapelketa herrikoia egingo dute; arratsaldean ipuin-kontaketa Pello Añorga idazle eta ipuin-kontalariaren eskutik; eta, eguna bukatzeko, pintxo-potea 19:00etan eta Nikotina musika taldearen kontzertua 00:00etan.