Berastegiko kultur astea gerturatzear da, eta dagoeneko martxan da aurtengo XXVI. Argazki Rally herrikoia ere. Bertan parte hartzeko interesa dutenek gaur izango dute horretarako azken eguna. Izen ematea udal bulegoetan, 943 68 30 00 zenbakira deituta, kultura@berastegi.eus helbidera idatzita edo 688 681 952 zenbakira Whatsapp bat bidalita egin daiteke.
Ostegunean, egunean zehar, parte hartzaileei telefonoz, helbide elektronikoz edo Whatsapp bidez aurtengo gaia zein izango den jakinaraziko zaie. Aukeratutako hiru argazkiak helbide elektronikoz bidali beharko dituzte iganderako, 23:59 baino lehen, kultura@berastegi.eus helbidearen bitartez.
Argazkiak egiterakoan, ohi bezala, Berastegiko mugen barruan atera beharko direla zehaztu du udalak, eta ezin izango dira manipulatu. Aurkezten diren argazki guztien artean epaimahaiak hiru argazki onenak aukeratu ditu eta saria izango dute. Sari banaketa azoka egunean izango da, eta argazki guztiak ikusgai jarriko dituzte udaletxean, kultur asteak irauten duen bitartean, eta Berastegi.eus webgunean.