Larunbatean egun osoko festa antolatu dute Berastegin. Euskal Jaia egingo dute, beste urte batez, eta euskal jantziak janzteko deia egin dute antolatzaileek.
Aurten ere, pintxo onena nork prestatu lehia egingo dute goizean. Zazpigarren urtez jarraian egingo da pintxo lehiaketa, eta 11:30ean hasiko dira parte hartzaileak pintxoak prestatzen. 13:00etan, pintxo dastaketa izango da, eta ondoren, VI. Mikroipuin lehiaketaren eta I. Komiki lehiaketaren sari banaketak egingo dira.
Herri bazkariarekin jarraituko dute festan. Bazkaria norberak eraman beharko du, eta ogia, edaria eta kafea Urepele elkarteak jarriko ditu. Horren ondoren, 16:00etan, euskal jolasak egingo dituzte, eta 17:00etan, erromeria izango da, Elizagoien ahizpen eskutik. Festan jarraitu nahi duenak Urepele elkartean izango du aukera, luntxa jarriko baitute iluntzean.
Bezperan, pintxo potea
Asteburu betea datorkie berastegiarrei. Ostiral honetan, pintxo potea egingo baitute, herriko tabernetan, 19:30etik aurrera.