Herriko gazteek festa eguna dute, gaurkoan. Hobeto esanda, batzuentzat festa jarraipena izaten ari da. Izan ere, atzo abiatu zituzten Berastegiko Gazte Festak ping-pong txapelketa, pintxo-potea, bakarrizketa eta kontzertua medio.
Gaurkoan, egun osoko egitaraua prest, jendeak ez du hutsik egin. 13:00ak aldera bildu dira gazte eta ez hain gazteak futbol zelaian. Jan-edana eta kirola uztartu dituzte. Txakolin dastaketa egon da batetik, eta bestetik, toka txapelketa. Herritar ugarik parte hartu du lehian: 9 txapak eskuan hartu eta erdiko metala zeinek gehiagotan jo. Mikrofono eta guzti, atzoko parrandaren aitzakian ez zen trufarako aitzakia gehiegirik behar.
Festak luze joko du gaur Berastegin. Izan ere, herri bazkariaren ondoren, Bide batez erromeriak dantzarako aukera eskainiko du; eta iluntzean, zahagi ardoa, bingoa eta DJa ez dira faltako.